KUTTUMBACHEM VORTEPONN VOLLKHUN GHEUN, TEM SAMBALLUM-IA

Opurbayechea bhavam-bhoinimno, amchea Gonvlli Bapan hea gonvllik vorsa ‘Amche-xim rav’ (Stay with us) ho vixoi kaddun, sogllea Yadnikank, Dharmikank, Loukik bhavarteank ani borea kallza-monachea monxank gonvllik chitt boroilea. Veg-veglle vixoyamcher aplem lokx ghaltanam, kuttumbam sovem axil’lo usko tannem dakhol kela. Gonvlli Bapan kuttumbak oso ulo kela; ‘Kuttumbachem vorteponn vollkhun gheun, tem samballum-ia’. Hea uleacher ami aiz nyall korum-ya.   Dusre suvater, Pap Saib Fransiskan ‘Amoris Laetitia Kutumb’ mhonn hem voros prokaxit kelam ani tem ‘Ghorabea’ khatir bhettoilam. Hem voros Marsache 19ver, 2021 tem Junhache 26ver, 2022 passun chalu astolem. Hem monant dovrun, Pap Saib Fransiskan ami soglleamnim ‘Amoris Laetitia’ ho dakllo vachunk ani tantunt aslole xikovnnecher niall korunk vinonti kelea. Hem monant dovrun ‘Amoris Laetitia’ hem dakhleacho adar gheun ho nyhall ami fuddem vhortoleanv.

KUTTUMB MHUNGE KITEM?

Tumchea dolleam mukhar ho vichar maddtam tedna hea vicharacher ami hea adim nyall korunk nam oxem nhoi. Punn, mhotvachea vixoyamcher porot niall kortanv tedna amchem mon ani jivt ami novsorunk ek soeg favo zata. He dixen kuttumb mhunge kitem hacher il’lem mon ghalum-ya.

Bhagevont Pab Saib Juanv Paul dusro aple chittint ‘Familiaris Consortio’ (15) oxem mhunnta. Kuttumb mhunge munxacho somudai (Family is a communion of persons) Ho munxacho somudai Lognachea Sonvskara udexim ghoddun yeta. Mhuntoch, dor ek kuttumb povitr ani mogache buniadir bandlolo asta. Oslea utranim Bhagevont Pap Saib Juanv Paul dusro amkam kuttumbachem vhorteponn dakhoun dita. To mhunnta kuttumb, zachea jivitachi buniad mogacher bandloli asa, to zaun asa ek zonnacho somudia, zatunt ghov-bail, avoi-bapui ani bhurgim ani soirim-dairim sangatan jietat.  Heach khatir tannem Kristi Kuttumbank ek ulo kelo ‘Kuttumba, kuttumb za’ (FC. 17).

Ho ulo marlear aiz challis vorsam bhortat (1981 – 2021). Amchea kanar sadhlolo kai ho ulo? Sadhlolo zalear amchea kuttumbachi doxea khoim paulea zait? Sadhunk nam zalear passun kitle bhasamni Devachem Utor amkam zagounk soddtalem, zaum Provochonantlean vo dusrea otmik kariavollintlean. Odik ani odik amchem kuttumb Devache yevzonnecher bandhlolem korche passot kitlim vaurlim zait? Amchim kuttumbam khoim pauleant kai? Koxim asat kai? Amchea kuttumbamni kitem cholta zait? Osle kaim vichar gheun amchea kuttumba vhoir niall kortanam, gunneamvachem mon gheun konnachoch dos korunk nhoi. Punn, oskotayo somzun, amchem kutumbachem vorteponn ollkhun, koxe bhaxen amcheanim tem samballunk zata hacher mon ghalunk vaurum-ya. 

Hea Gonvllik vorsachea vixoy-achi somzonnim ditanam, amcho Gonvlli Bap amchea kuttumbank oso ulo marta. ‘Kuttumbano, kuttumbachem vorteponn volkhun ghe ani tem samball’. Tacho kherit usko kuttumbam sovem dakholl zata. Amcho Gonvlli Bap dor eka kuttumbant axil’lem boreponn vollkhun gheunk apoita. To mhunnta ‘kuttumbachea dor eka vangddia bhitor ek mogacho thevo asa. Hem mogachem bhanddar eka-eka kutumban novean soddun kaddunk goroz’. Kaim kuttumbamchea vangddeamni koxttam-addkholim modem, Jezuk aplea jivitacho maz kelo dekhun, tanchem jivit anonbhorit zaunk paulam. Dusre vatten, veg-vegllea karanank lagun guspa-ghondollak sampoddlolea kuttumbacher to lokx ghalta. Kuttumbachea vangddeam modem, mhunge ghov-bhaile ani avoi-bapui ani bhurgeam modem sombondh bigodleat. Magnnem borobor jevop ani sangatan vell sarop unnem zala tem polleun tacho usko vaddlo. Sonvsarache bhullovneank bhullon Lognachea Sonvskaracher visor poddlolo disti poddta ani amchim tornattim jivitachi vatt chukun vaitt visovank sampdun niraxi zaleant mhunn to khontt porgot’ta. Osle poristhitint ‘amche-xim rav’ hem amontronn Jezuk novean korunk to ulo marta. Amchea Gonvllik Bapachea hea uleak man diun Kuttumbachea vangddiamnim vhorteponn volkhun gheunk ani tem sambalunk kitlem gorjechem tem Pap Saib Francis hannem boroiloli chitt ‘Amoris Laetita’ hacho adar gheun xikum-ia. 

Ho adar tin vixoyamni vanttolo asa

MOG – Love (AL Chapter 4)

SONVAD – Dialogue (AL 136 – 141)

SANGAT – Accompanying (AL – Chapter 8, FC 69)                       

MOG: Bhagevont Paulun Korintkarank boroilole Poile chittint, teravea avesvorant, mogachi xikounk diloli asa tacher Pap Saib lokx ghalun, Amoris Laetitia-sacho chovtea avesvorant, (Love in Marriage), kholayen ek-ek mogachea gunnacher xikoun dita. Kaim gunnaccher amchem lokx ghalum-ya. 

Mog mhunnlear sosnikay. Sosnikay mhunnge mhaka zai toxem dusreak vagovop nhoi. Sosnikay mhunge dusreachem khaxeleponn ollkhun, hea sounsarant tim asat toxem, tankam jieunk hok’h asa mhunn mandun ghevop.  Jedna mhojea mona pormonnem dusrean vagunk zai, sombondant kitench vankdem asunk zaina vo hanv mhakach vhoddlo mhunn somzotam tedna khub proxnn uprastat. Uprant, amchi sosnikay halunk lagta. Amchea utramcher ani bhavnamcher tabo dovrunk avgodd zata. Dekhun, Devachem Utor oxem sangta, ‘soglli koddsann kallzantli bhair ghalat; rag ani krodh monant dovrunkuch nakat; bob marum nakat; jastio marum bond korat; soglle torechem khotteponn soddun diat’ (Efez 4: 31). Niz mog mhunta to sosnikayek vengoita

Mog peleache sevek hajir asta. Peleachi seva korpi aplea korneantlean doya-moya dakhoita. Mogan bhorlolo munis pelea sovem doyal korneo adarta, to peleache sevek hajir asta. Bhagevont Paulu moga vhoir boroitanam mog mhonnlear bhextinch bhavnanch nhoi mhunn sangta. Niz mogant kornneamchem boll asta. Mog korianim liplolo asa. Hebrev bhaxen mog korop mhunge borem korop. Bhagevont Inas de Loyola mhuntalo ki ‘Utram poros chodd mog korneamni dakhounk gorjechem’. Oxem tor, khorea mogachi dadoskai vo khuxalkai mhunntat ti gheupant nhoi punn diupant ani seve chakrent asta.

Mog asta thoim nattkay nam. Mog dusreachem boreponn polleta. Peleachea boreponnant to khuxal zata, dukhi vo niraxi nhoi. Peleakodde ani aplea kodde kitem asa tem sor korunk bhovonam. Aplea peleacho ies polleun khoro mog udna marta. Niz korpi munis Devan zonn ek-ekleak veg-vegle gunn dilole asat ani zonn ek-eklo aplea gunnam udexim aplem jivit folladik korta mhunn ollkhun gheta. Je bhaxen amkam Novo ani dhavo mandament xikoita toxem niz mog peleachea vostuchi vo bhailechi axa korinam.

Mog koslich boddai korinam. Zanchea kallzant mog asa tim apununch vhodd mhunnon somzonant. Tancho ‘focus’ apunn nhoi. Mogacho munis apun kitlo uxar, kitlo gineamni, kitlo uncha mollacho te polleun dusreank sokla uddoina. Khoro mog korpi vollkhun ghetat ki dusreant zaitem boreponn asa, dekhun dusream sovem to somjikay, usko ani mog dakhoita, odik korun durboll, gorib dakteam sovem. Mog lhanvikayent khuxal zata. Haka lagun niz mog korpi bhavarthi peleacheo oskotai ollkhun gheta ani tancheo chuki bhogxita. Pap Saib sangta ki ami amchem gorv soddun diunk zai ani pelea sovem khatikayen vagunk zai.

Mog dusream sovem mannsugen vagta. Pelea sovem zobordost korinam. Portench zalear xantitayen cholta. Ani goroz poddlear pelea khatir kitlem-i sonsunk toyar asta. Oslea boreponnant to jieunk soddta mhunntoch pelea sovem sombond koxe sambalche ani mozbut korche hacher aplem mon ghalta. Haka lagun tachea utrantlean dusreank buzvonn ani ghottai mellta, jinnek ut’tezon ani hurba favo zata.

Mogacho munis udar. Oslo munis apleachoch faido pollenam punn dusreamcheo gorzo vollkhun gheta ani adar dita. Apun adar korta zallear apleak portun kitem melltolem tem to chintinam.Oslo mog ani boreponn dakhounk sompem kai? Nam, sompem nhoi punn amcho Pap Saiba sangta ki amcheanim oslo mog dakhounk zai kiteak Devachem utor mhunnta ‘Tuvem funkot ghetlam, funkot dhi’ (Mt 10,8). 

Mog dusreamcheo chuki-khoddi somzun gheta. Dusreacho oskotayeo polleun bezar zaina. Boldench zallear apleakui chukeo-khoddi asat mhunn ollkhun gheta. Jezu amkam ugdass korta sangun ki ‘jedna tujea dolleant edi vhoddli patti asa zallear tum dusreachea dolleantlem kisor kiteak polleta?’ He bhaxen amche guneanv ami mandun ghetat zalear bhogsonnem magunk ani diunk sompem zata. Mogan bhorlolo munis bogsoneacho munis. To apleak dukhoiloleak bhogsunk fuddem sorta. kiteak bhogsonnem diunk sompem mhunn nhoi vo taka dukh zaunk nam mhunn nhoi. Punn, to kalljidar zata ani Devachem bhogsonnem apnem chaklam/onbhovlam dekhun ani taka-i Devachem bhogsonnem zai dekhun to aplea peleak mogan bhogsunk toyar zata.

Mog bhorvanso dhorun ravta ani dhiran soglleak fuddo korta. Jivitant zaite toreche koxtt ani addkholeo melltat. Soglle dongor choddunk sompem zainam, thodde pautt kantteamchi dukh sonsunk zainam. Punn, mogan bhorlolo munis sompeponim har mandun ghenam. Tacho bhorvanso jivo asta ani to bhorvanxean soglleak fuddo korta, To aplo bhavarth mogacher thiraita. Visvas mogachi buniad mhunn somzun dubhavachim chintnam sogllim pois dovorta. Hachem ani tachem aikon aplea bhorvanxeak kosllun poddunk to dina. Bogor, mog sogllea vadoll-mollak fuddo korun zoitivont zaunk yeta mhunn bhavarthan somzun aplim panvlam fuddem marta. 

Moga vhoir niyall kortolom zallear anikui zaitem sangum yeta, punn bariksannem hea thoddea mogachea gunnacher ami amchem lokx ghatlam tedna ami amkanch vichar korum-ya. Amchea jivitant ani kuttumbant koslo mog amkam disti poddta gai? Dor eklo ami mogachem vorteponn ani goroz ollkhun ghetanv zallear niz mogan jieunk ami kiteak chuktat tor? Kazar zaunchem adim kitlinch vorsam mogan aslolim, kiteak kazar zatoch doxim zatat? ‘Moro porian hanv tuka visvaxi astolim, kitlem-i dukh ailear hanv tuka soddchimnam, tuje vinnem mhojean jieunk zainam, tujea moga passot kitem-i sonsunk hanv toyar asa, tum mhojea kallzachem sukh, hem kalliz fokot tukach bettoilam – kazar zaunche adim hem sogllem sanglolem tem khoim paulam kai?  Niz mog mhunntat to fokot kantaramni vo tiatramni vo picturanim dakhovop vo fokot kanneamnim vo provochonantuch sangop kai? To jieunk zaina kai? Devan amkam ekuch mogachi adnia dilea – mog Devacho ani mog peleacho. Amchim  kuttumbam ‘Amoris Laetitia Kuttumbam’ ami korunk vaurum-ya. Niz mogak govai dium-ya. 

SOMVAD(DIALOGUE/COMMUNICATION): Amchea kuttumbachem vorteponn samballunk ani rakhunk somvad ekdom mhotvacho ani gorjecho. Amchea jivitachea onbhovant ami polleat zallear somvad nastanam amchean jieunk zainam mhunn amkam sidd zatolem. Sonvad mhunge eka-meka sovem utranim, chintnanim, anvddeanim, bhavnanim sombond zoddop. Punn, him utram, chintan, anvdde ani bhavnam koslim zaunk zai kai? Eka-meka sovem sonvad koso zaunk zai? Chodd ani chodd, goddie ami polletoleanv ki amcho sonvad favo toslo zainam. Ami uloitanv tedna  amchim utram vaitt, vikallim, ragachim, okmanachim, dusreak dukhoitat toslim zatat. Amchim chintnam noxttim, melim ani posddim astat. Amche anvdde girestkayen, axen ani apsvarthi sopnanim bhorlole astat. Amchim bhavnam fokot amcheruch lokx ghatlolim astat – Mhaka ekleakuch bhavnam aslole porim hanv dusreank vagoitanv ani dusreamchim bhavnam hanv polleunk vochonam. Oslea sonvadak lagun aiz kitlem odruxtt ani vaitt amchea jivitant ani kuttumbant amkam disti poddonam zait? Duspot, dusmakayeo, vadd-vivad, rag ani natkai – hem sogllem ami gheun bhovonant kai?

Bore sonvad samballun amcheamni khub boreponn ximpddaunk zata zallear, bore sonvadache gunn ami xikunk toyar asunk zai. Ek mhotvacho gunn mhunllear kalliz-monn diun aikop.  (Active Listening and not selective listening). Heach khatir amcheanim mhunnunk zata ki Devan munxak rochtanam ekuch jib dili ani don kan dile. Ami thoddem ulounk ani chodd bore bhaxen aikunk. Punn, amchea jivitant ami boldench kortanv. Ek jib ason ami chodd uloitanv ani don kan asonui ani thoddem aikotanv vo sarkem ani bore bhaxen aikunk fattim urtanv. Aiz kal kitlim kestamvam amche modem, kiteak? Kiteak ami naka zal’lem aikotanv ani uloitanv. Thodde pautt sarkem kitem tem aikonanstanam thodde ami utramcho uzo kortanv. Mhakach borem lagta tem aikop, mhakach aikunk zai tem aikop – oslem hanvem dhoronn dhorlea mhojem aikop ugttea monachem zaina. Bore bhaxen ani sarkem aikop mhunnta tedna ami amchem dhean-mon uloitolea monxachem boreponn ollkhun gheun aikop. 

Bore bhaxen aikunk soddtanv tedna takit korunk zaina. Sosnikay ani vell diunk mhotvachem. Hea adhunik sombordant, ami dhavunk soddtolea sonvsarant, amkam-i dhavunk zai xem dista. Dekhun, aiz munis dhavunk lagla. Punn, bore sonvad samballunk dusreachem bore bhaxen aikopachi goroz poddta tedna ami amchi dhanvpachi speed unni korunk zai. Kuttumbachea boreponnam khatiruch apun itle teag kortam, apnachem passun chintinastanam mhunnon sangun amche kuttumbache vhoddil dhanvot asat. Kuttumbachea vangddeank vell dinastanam kuttumbachi udorgott koxi zatoli kai? Jivitant proxn uprastat tedna somvad ekdom gorjecho – eka-mekak aikun gheunk vell korop mhottvachem. Hem kortanam dusreak khorem mhotv diupachem asta. Mhotv divop mhunnge apurbay korop, ut’tezon divop, dusreachea bhavanamnim amchem kalliz-monn ghalop, dusreachem dukh aplem korop ani mann-respet divop.

Jedna ami sonvad korunk soddtanv tednam ami amchem mon ugttem dovrunk vo asunk zai. Dor ekleak ap-aplem veglleponn asa, zaun tem veglleponn chintnachem, bhavnamchem, sonskrutik vo bhaxechem. Sonvad kortanam ekvottachem mon samballunk ekdom gorjechem. Hea khatir sonvad kortanam to sonvad ek competiton zaunk zainam. Konnachi har ani konnachem zoit hem boro sonvad pollenam. Sonvad zatat tedna dogaichem boreponn liplolem asa ani hench boreponn polleun, ulovop ani aikop zata. Dusrean mhojench aikonk zai kiteak hanv sangta tench khorem, oslem chintop aslear boro sonvad zaunk addkholl nirmann zata. 

Jedna kuttumbachea vangddeam modem bore bhaxen ulovpachem ani aikopachem kalliz-mon asta tedna tem kuttumb ‘Amoris Kuttumb’ zaunk pavtolem. Oslem kuttumb amchem korunk amkam zai vo ami toyar asat kai? Eka-mekachem veglleponn ollkhun gheun, oskotayeo somzun ani chukink bhogsonnem diun bore sonvad zoddum-ia ani amchem kuttumb mogan ani anondan bhorlolem kuttumb, ‘Amoris Laetitia Kutumb’ korunk vaurum-ya.

SANGAT DIVOP: Hea bhagant hanv kherit bhaxen amchea Yadnik bhavank mhojea dolleam mukhar dovortam. Hanvui ek tanche bhaxen Yadnik mhunn somzun ho niall mhak-a-i mhunn hanv lhanvikayen mandun ghetam.

‘Familiaris Consortio’ hea dakleant amchea Bhagevont Juanv Paul dusrean chovtea bhagant ek mhotvachi gozal kel’li asa ani ti mhunnllear tannem Povitr Sobhek zagoilam ani mhunnlam ki lognacho sonvskar zoddlea uprant aple gonvllik sevent amchea Yadnikamni kuttumbam sovem kherit usko dakhounk zai ani hem novem zoddlolem kuttumb koxem fuddem veta hacher lokx dhorunk, tanche lognik yatrent favo to adar diunk zai. Dor ek Yadnik, ek boro gonvlli koso, aplea xelliam xim ravun tanchim seva korta. Zalear, taka aplea xelliamcho vas yeunk zai. Sogllea xellaimcho vaspus ghetanam, lognik jivitant bhitor sorleant ani lognachim poilim panch vorsam chodduch gorjechim mhunn tannem zanna zaunk zai. Kiteak lognik jivitachim poilinch panvlam ekdom gombir mhunn disun ailam ani him panvlam marta tedna tankam zaiteo addkholii ani avanhan tankam mellunk xoktat.  Oslea vellar sarkem marg-dorxonn vo budh mellonam zalear tanchem lognik jivit tufanank sampdon kabar zaunk yeta. Anik, oxench kitem, zaitea kuttumbam sovem ghoddlolem amkam disti poddta. 

Amcho Pap Saib Francis-ui ‘Amoiris Laetitia’ hea dakhleant Yadnikank ulo korun mhunnta ki Yadnikamni kuttumbam sovem kherit usko dakhounk gorjechem odik korun tufanank sampoddlole kuttumbam sovem – him jim kuttumbam kosllun poddleant ani doxim zalleant. Hea kuttumbank Povitr Sobhechi xikoun diunk, ani tannim aplea ontoskornachi chovkoxi korun, aplea jivitacher nyall korunk ani chukimchi dukh dovrun aplem jivit novean fuddem vhorunk adar diunk favo. Odik korun, jea kuttumbant avoi-bapui doxim zaun bhurgeamcher porinam zal’lo disti poddta tea kuttumbamcher dolle dovrunk magta. Avoi-bapaichea chukink lagun aiz bhurgeamcho fuddar kallokant poddlolo asa. Eka vellar tem bhurgem avoi kodde zalear, dusrea vellar tem bapai kodde asta. Tachea bhurgeamponnar tannem pollelelim kenstamvam ani zogddim asat; vo aikololim darun ani vikallim utram tanche kallzant asat ani thodde birankul dekhave tanchea dolleam mukhar yetat.  Bhurgeaponnar oslo tancho onubhov zal’le kodden hi bhurgim aiz vaddleant khorim, punn kaim zanam vaitt rostear asat. Hem mhuntanam sogllea avoi-bapaimcho guneanv korunk nhoi, punn Devache kakluticher nodor marun tea avoi-bapain apli zababdari ollkhun gheun ti bhurgeam sovem pallunk gorjechem. Hem sangtanam hanv ollkhun gheunk soddtam ki zaiteo avoi-yeo vo bapui ‘single parent’ koxim aplea bhurgeamcho sambal korunk zaite koxtt trass kaddtat. Oslea avoi-bapaim sovem amche Yadnik usko dakhoitat tedna, aple koxtt-addkholink fuddo korunk tanak boll ani ghottai mellta. Apnachea sangata konn tori asa mhunn somzun tankam ghottai mellta. Amchea Yadnikam fuddem oslim govllik avahan mandlolem asa.

Hache bhair, amcho Bism Saib aple chittint him pattlim don vorsam amchea kuttumbank Covid 19 he maramarik lagun kitle koxtt ani tras poddleat hacho ugdass korta. Veg-vegllea karonank lagun guspa-gondollak sampoddleat ani kuttumbik jivitacher moddam upraslolea kuttumbam sovem amchea Yadnikamchem kalliz odonk zai. Kuttumbam sovem usko dakhounk amcho Bism Saib kaim kuttumbik poristhitincher lokx ghalat. Je bhaxen, zaitea kuttumbamni, ghov-bhaile modem, avoi-bapui ani bhurgeam modem sombond bigoddleat, deshantrak lagun (International migration) kuttumbam doxim zaleat, kuttumbant borobor magnnem korop nam, sangatim jevonn korop unnem zalam, kuttumbachea vangdeamni eka-mekak vell divop ani eka-meka sovem vell sarop unnem zalam ani adi

Osleo kuttumbik poristhiti aiz vaddot vetat dekhun amchea Yadnikamni aplea kuttumba sovem ravop ekdom mhotvachem ani gorjechem zalolem asa. Kuttumbachea sangata ravop mhunge tanchea dispot’tea jivitant ghoddta tacho usko dovrop. Kuttumbik jivitant meter zavop nhoi, punn kuttumbik jivitache yatrent zata titlo adar divop. Kherit bhaxen kuttumbamni aslolo mog novean soddun kaddunk, zoimsor bhogsonnem ghevop ani divop chukta tankam adar korunk ani jea kutumbachea vagddeamchea kallzant ghai zaleat ani pekounechi goroz asa tankam pekouni favo korunk amchea Yadnikamchea gonvllik vaura mukhar ek vhodd avhan ubem zal’lem asa. Amchea Yadnikank asunk zai tea uskea vixim uloitanam amche Yadnik zaite bhaxen aplea xelliam sovem usko ani mog dakhoita tacher visor ghalunk zainam. Amche Yadnik aple porjechea passot jietat ani aple porjechi mogan seva kortat tem zaitea toremni disti poddta. Kaim Yadnik apleakuch visrun gorjek, akantak sampoddloleank adar diunk vetat. Covid 19 he maramarik lagun jedna kitleach kuttmbant dukh ailem, tancho mogacho morun gelo, kaim kuttumbam kallokant poddlim, favo ti nokri nam zaun kitlim kuttumbam tuffanank sampoddlim, kitlem niraxiponn ani sonkott ube zale. Oslea vellar kitlea amchea Yadnikamni, kothin ani avgodd goddeanim, amchea kuttumbak adar korunk nam zait? He toren, sodankal aple porje passot jieunk amche Yadnik Jezuk lagim asunk zai. Veg-vegllea avahanak fuddo korunk amchea Yadnikamni kallidarponnan ani mogan panvlam marunk, Jezu tanche modem asunk mhotvachem. Ho vaur fuddem vhorunk ‘amche modem tum rav Jezu’ oslem amontron dor disak magnneantlean korunk amchea Yadikam passotui ami magum-ya.

Bism Saiban boroilolea utranim ho mhozo nyall sompoitam. ‘Povitr Kuttumbache dekhin ani vinnovnnen, hea Gonvllik vorsant, amchem-i kuttumb ‘Amors Laetitia Kuttumb’ korunk bhar gheum-ia.’