20th July 2014: NFP Aitara Misacho Sevadhorm

20/07/2014

Sadea Kallacho Sollavo Aitar

SOIMBA PORMONNEM KUTTUMB YEUZONN PROCHARACHO DIS

(4^th Natural Family Planning (NFP) Propagation Day)

Misacho Vixoy: JIVIT BODLUNK SOEG MELLTA TO PALLUN BAPACHEA RAJEANT VOCHUM-YA

Gayonank Suchnna:

Survatechem git          : A-2    Amchea Bapa Sorgavelea

Danam Toyare Vellar  : C-18   Iadnik Unddo Somorpitanv

Komiyanvchea velar   : D-14   Jezu dhakvel ami fantte

Xevottachem git         : T-56   Tujea gopant Maie

SURVATECHIM UTRAM:

Survetekuch thaun Devan, Logn Sonvskar, Ghov-Bailechea boreponnank ani bhurgeak zolamank haddunk rochun dovorlam (GS 48). Tor aplea logn jivitant kitlim bhurgim zaunchim ani tim kedna zaunchim hi kherit Povitr zobabdari Devan ghov-bailek diloli asa. Devachi yevzonn aplea sovem mandun gheun, ho nirnoi gheupak ‘zobabdar avoi-bapuiponn vo responsible parenthood” mhonntat. Hi zobabdari pallunk  Devachi mandavoll aplea supikponna (fertility) sovem tannim zanno zaunk goroz. Hea Devachea  mandavollik ‘Natural Family Planning’ vo NFP vo ‘Soimba pormonnem kuttumbik yevzonn’ mhonttat. Zaitea zonnank tachi khorbor na. Haka lagun aiz, amchea dhormpranttant, xegit hea chovtea vorsa, NFP procharacho dis ami palltanv. Addeche upai (Artificial means of family planning vo contraception) vapurtoleanim jivit bodlunk soeg mellta to pallun Bapachea rajeant vochunk aicho sevadhorm amkam uskaita. Amchea firgojent toxench amchea dhormpranttant sogllea logn-zaloleanim hi Devachi mandavoll aplea sovem xikunk ani jivitant pallunk, hea Misa bolidanantlean Bapa lagim magum-ya.

PIRACHITACHI RIT:

Dhonia Deva, poti ani potin koxim, amchea ghorabeachi zobabdari tuven amchea hatanim ghatlea. Bhurgim tujem dennem mhonn somzun gheunk ani tankam mogan gheunk ani vaddounk tuvem amkam apoileant. Punn ami amche lognik jivitant addeche upaim vorvim ani dusrea vankdde chali vorvim tuji mandavoll modlea. Tuje mandvolli add vetolea soglleamchea navank ami sobhemazar bhogsonnem magtanv. Amkam bhogos Saiba.

Somia kakut kor

Krista kakut kor

Somia kakut kor

VACHPA ADIM VIVRONN:

Aichem poilem vachop Dev promannik mhontoch, mon’xan-ui, aplea patkachi khont dhorun, jivit bodlun, promanikponnant jieunk ulo korta.

Dusrea vachpant, Bhagevont Paulu sangta ki ami osokt mhonnun, promannikponnan ami jieunk lagot zalear, Povitr Atmo promannik mon’xachea adarak yeta, tanche pasot Deva lagim vinonti korta. Haka lagon Devache khuxe pormonnem ami jieunk uskaita.

Aichea tisrea vachpant, Bhagevont Matev, vopaream vorvim, jivitachem bodlop haddunk lokak Jezu somzaita mhonn amkam kollit korta. Amchea jivitachem bodlop haddunk, Bapachea mogan vaddun ami Bapachea rajeant portun pavunk vatt dakhoita tem chintan aikum-ya.

PROVOCHONAK SUCHNNA:

Jivitacho onnbhov

Ek zoddi, Pat ani Amy, aplea lognink jivitant, soimba pormonnem kuttumbik yevzonnenk vo NFP xikonk ani aplea jivitan apnnaunk koxim pavlim ti govaiki dita. Tanche he yatrechi khobor chint diun aikum-ia. (Hanga Yadnikan eka zoddiek gheun hi tanchi govaiki vachunk dium yeta).  

Amy: Hanv Amy ani mhojea ghorkara, Patrick-a borobor lognik jivitachim 16 vorsam ami somorombhlim. Ami Soimba pormonnem Kuttumbik yevzonnen amchem jivit boreak koxem bodol’lem tem thoddkean sangta.

Ami dogam-i bhavartan zolmun ani vaddlelim Katolkam. Ami sodanch chintalim ki Katolk dhorman, logn jivitan contraception OK aslem. Don bhurgim amkam puro oxem chintun ami logn zalim. Tache uprant mhojem ‘career’ ani ‘hobbies’ fuddem vhorpak havem yevzonn kadloli.

Mhoji bhavartachi yatra, poilem bhurgem kusveant astana bodlonk pavli. Tedna poilech paut bhavarth vaddoi mhonn havem Dhonia lagim maglem. Ani Devan khorench ek ojap kelem. Khoreponnim Katolk jivit jietolea mhojea ixttam sovem mhoji bhett keli. Tantuntlea eka ixttan mhaka don vostu dileo. Hea vostunk lagon mhojem akhem jivit bodol’lem. Poili vost mhollear ek CD: ‘Contraception Why Not?’ ani dusi vost ek pustok, ‘The Art of Natural Family Planning vo NFP’. Hatan podlea uprant survatek mhaka boroch rag choddlo kiteak sogllinch ‘Contraception’ aplea jivitan vapurtalim. Hem sarkench mhojea chintna add zalem! Dusrem mhollear heo don-ui vostu mhojea monacher khelunk lagleo. Poilech paut mhaka gomun ailem ki hanv ‘nanvam purtem Katolk’ mhonnon. Asa toxem hanv jivit jieunk chalu dovorlem zalear, Jezun ghoddlole Povitr Sobhechi xikounn hanv pallina zalear, hanvench mhakach Kristachem patlavdar mhonnonk sarkem nhoi mhonn disun ailem.

Pat: Amy-n mhaka ti CD aikonk dili ani NFP-cher odikh vachunk boll sanglem. Tantuntlean chear vostu amchea monan khor rigleo: Poilem mhollear ‘Oral Cantraceptive vo Emergency Contraceptive pillam vo Copper-T bhurgeacho ghorbpatt korunk xoktat-hem xiklim. Amche dolle hantun ugoddle.

Dusrem mhollear Pap Saib Paulu Sovean, challis ani sov vorsam fattim dilolim bhakitam   khorim tharlolim amkam mell’lim. ‘Contraception’ lokamnim vapurlem zalear chear vostu ghoddun yetoleo mhonn tannem bhakit kel’lem. Poile suvater somazantlim mulleam unnim zatolim. Dusre suvater Ostoreank ek vost koxi lekhunk lagtolim ani tanche moriadik anink man urcho na. Hantun Povitr Sobhechi xikounn khorench Povitr Atmeachea preronan zatat mhonn amkam thavem zalem. Tisre suvater sorkar, ghorabean bhurgeancho ankddo tharaitolo ani chovte suvater lok apli kudd ek karkhano zalole porim, ‘on/off’ korun choloitolim mhonn tannem Humane Vitae hea dhaklean boroun dovorlem. Ani tachim sogllim bhakitam sotan bodol’lolim amkam dixtti poddta.

Tisrem mhollear 1930 pasun soglleo Kristi Igorzo Contraception mha-patok mhonn xikoitalim. Anglican Povitr Sobhen 1930 vorsa, gombhir karonnank logn jivitan, contraception vaprunk poili porvangi dili. Hantuntlean survat zali. Magir zor tor he addeche upai lagona zalear, lok gorbhpatt korunk laglo. Ani svokas-svokas sogllo lok he vatten dykhlun gelo. Katollkam, Povitr Sobheche add.

Chovte suvater ami xiklim ki NFP vapurtolea logn zoddeam modem Divorce rate sarkoch unno! Contraceptive vapurtoleam modem odmasan pon’nas tok’kea disun yeta.

Amy: Pat ani hanvem dusrea bhurgea uprant NFP classik nav boroilem ani hanvem mhojea dogam cheddeam khatir kam sodd’chem kelem. Mhaka anink bhurgem naka aslem, ani haka lagon NFP Katolk Contraception-oxem mhaka dislem. Mhojim chintam sarkinch urfattim tharlim.  NFP khorench upkarta ani titlench faideachem mhonn amkam jivitant pall’lea uprant disun ailem. Dor mhonneank ghova borobor lingi ani khagi jivita babtint ulounk podlem tedna khorench jivit bodlonk pavlem. Dor eka lognachea vataran Devacho hat amkam disunk laglo. Ami kitlim svarthi aslim tem amkam gomun ailem ani xekim ami tisrea bhurgeak ugtim zalim. NFP-in amkam jivitak ugttim kelim!  Dor bhurgea fatlean hanv Devak sangtalim, “Puro anink mhaka anink bhuream samballunk zaunchem na”. Punn dor pauti Sorvespor ‘Mhojer bhavarth dhor’, mhonn mhaka sangunk laglo. Dor bhurgean amkam addkholi utpon keleo-hem khorem punn tanchi khuxalkai tache von odhik vhorti tharali. Dor bhurgea sovem ami amcho mog vantchi goroz poddonk na; bogor to vaddot-choddot veta mhonn ami xiklim.  Atam, dor mhoinneank, bhurgeache denneank, khorench gombhir karonnank lagon chukovnnem (abstinence) korunk zai vo nam tem bhasabhas kortanv ani supikponnachea disamnim ani chukovnnem kortanv.

Amkam sat bhurgim asat. Lokak disot ki NFP fail zalem mhonn sat zalam. Oxem nhoi. Punn chintlolea poros, panch anink bhurgim Devan amkam favo kelim hem polleun ho upai khorench folladik tharlo oxem amchean mhonnum yeta. NFP-in amkam jivitak ugttim ravunk xikoilim. Bhurgim nastana jivit koxem zatolem aslem tem ami yevzonk pasun zaina.  Bhurgem zaupak NFP khorench upkarta ani 100% soimbik. NFP khorench ani Deva sovem, tuje poti-potini ani bhurgeam sovem tujem kalliz ani  tuzo sombondh khorench bodlun dita.
Pat: NFP-chem ani ek boreponn mhollear tum tujea ghorkarak/ghorkannink asa toso/toxem mandun ghetai, Devan taka rochlam tech bhaxen! Tum tuje potinicho sompurnn mog kortai, tachem supikponn ani sogllem mandun ghetai ani tea pormonnem vagtai. Tumchea moga modem aniek kainch adkholli ghalinai. Tum, Deva  borobor, aniek portun rochun yeunk zai naslolea otmeak jiv diupachea vavran sohobhageli zatai; nitekallim zogtolo otmo tumche vorvim Deva borobor sohobhageli zatai. Kedem vhodlem bhag amkam!

NFP xikun, amcho bhavarth vaddot gela. Povitr Sobhechi zannvai polleun, sonvskarani melltolea kurpen bhoron, amchi vatt ami atam tankunk xikleanv.

Amchi govaiki tumi chint diun aikoli mhonn kallzan thaun ami tumkam dhin’vaxi.

Sondex

Aichi tinui-i vachpam monxak tachi chal vagnnuk ami jivit bodlunk novsorunk ani nitt rostear cholunk uskaita.  Poilea vachpant khori zanvai mhonllear Devachi ollokh ani tachi podvi amchea voir oxem spoxtt korta. Hi zanvai mon’xak kallokhi rajeachi (devcharachem raj) ani sorginchea rajeachi (Devachem raj) hanche modem ontor vollkhun gheunk uzvadd dita. Hi  zanvai mon’xak Devak dhinvasunk ani vakhann’unk apoita kiteak to podvedar, rochnar ani sasnachem jivit.

Dusrea vachpant Bhagevont Paulu amkam magnneantlean amcho sombondh Deva sovem bandunk, Dev kurpen vaddounk ani Dev uzvaddan patkacher zhuz mandunk apoita. Povitr Atmo amche pasot dis-rat vinonti kortolo mhonn amkam asvasonn dita. Tor vaitoveacher zhuz mandunk Povitr Atmeak ami ulo korum-ia. C. H. Dodd magnnea vixim oxem mhonnta, “Magnnem mhonllear amche bhitorlo Dev amchea voir aslolea Devak bhettunk uskaita (Prayer is the divine in us appealing to the divine above us).

Aichea tisrea vachpant Bhagevont Matev tin vopari vapddun amche lagim uloita. Heo tin vopari monis ek yatrekar mhonn amkam ugdass korta. He yatrent taka addkoli asat, tallneo asat, koxtt-dukh asa; punn monis zor Devacher patieta zalear hem Devache raj sansvachea biam bhaxen tacho bhavarth vaddtolo. To taka patkantlo mekhlo zaunk adhar zatoo ani tache bhitor aslolo ner umtun kaddun taka bhagevontponnak pavoitolo.

Az amchea dhormprathant, somiba pormonnem kuttumbik yeuzonechea procharak bhetoilolo aitar monoitanv tedna hea Devachea Utrachea uzvaddan, somaz bhuloita ani vankddo ner vompta, tacher, zoit vhorunk, amchea logn zal’lea zoddeank apovnnem asa.

Zobab

Amchea jivitache dixent vo bhesant Devachi khuxi sodunk, Devachem Utor amkam sfurti dita mhonn amcho Govllik Bap aple gonvllik chitint, logn zal’lea zoddiank, bhes borem margdorxonn korta.

1. Sorgest Pap Saib Paulu sovo aplea Encyclical “Humane Vitae” hatunt avoi-bapiak Deva borobor bhurgeak zolmank haddunk ek kherit zobabdari diloli asa mhonn sangta. Ti tannim somzun gheun jivitak ugttim ravunk-hi Devachi yevzonn mhonn spoxtt korta. Fokot gombhir (grave) karannonk lagon sod’deak bhurgeak zolmank haddunk poristhi’ti na zalear, aple potinichea osupikponnacho faido kaddun, chukovnnem korchem mhonn sangta. Hantun-uch logn zalolim Devak aplea jivitacho Dhoni mhonn mandun gheun, apunn tachea pormonnem cholon Devachea Rajeachim bhurgim koxim tim jietat. Ho ghov-bailecho mog Deva sarko mog. Ho mog mo’nxallo (fully human) fokt ghov-baile modem (exclusive) purto mhunge kainch bhairainastnam (total) ani novea jivitak ugto (open to new life). Oslea mogan jietelim ghov-bail Devachea mogan vaddtat. Tednam ki tanche modem addeche upai (contraceptives), gorbhpatt (abortion) korchi goroz poddchina; tanche modem ovisvaxiponn aschem na.
2. Heach Pap Saib Paulu Soveak, Pap Saib Francis, Bhagevont mhonn Otumbrachea mhoinneant tisre vixv Osadharon Bispache synodachea somiar porgotolo. Tachea vinovnnen, kusveant aslolea bhurgeak zaite ‘defect’ aslole ani zolmun tachea mendvacher tacho porinam zatolo mhonn sanglolea avoin gorbpatt nivarlem ani eka bore bolaikechem bhurgem zolmank hadlem. He avoicho oslo visvas amcho korum-ia. Hea visvasan ani ek bhurgem rochun haddunk amchea logn zaloleanim ugttim ravchim. Kusveant aslolea bhurgeak, voizachea sangneant bextench marun uddoumchem nhoi.
3. Hi Devachi mandavoll vevharant ghalunk mon’xak magnneachi goroz. Ghov-baileche khasgi magnneantlean sonvsar dita tea bhuloinecher ani tallneacher zhuz manddunk zoit mellun gheunk gorjechem. Povitr Atmo tanchea adarak pavtolo, tanche pasot Deva lagim prarthona ubhartolo. Tor addeche upai vapurtoleanim te soddun diun, Soimba pormonnem kuttumb yevzonnecho upai xikunk ani jivitant Devacheea mandavolli pormonnem jieun, aplea jivitant purnn khuxalkai onnbhovchi. Tednach ki ami Devak manovlolim mon’xam zatelim; aplea Bapachea Rajeant suria vori porzolltolim (Ref. Mt 13:43)

BHAVARTEANCHEM MAGNNEM:

Deva amchea Bapa, aiz ‘Soimba pormonnem kuttumbik yevzonn’ prochar kortolea  aitarak ami tuji bhurgim amcheo gorzo tuje mukhar ghaltanv.

1. Francis, amchea Pap Saibak, Filipe Neri, amchea Govlli Bapak ani sogllea Povitr Sobhechea fuddareank, tanchea hata khal aslele porjek ani odik korun lognak toyari kortolea ani logn zal’lea zoddeank, he Devache mandavolli vixim zagrutai haddunk vavrunk, Bapache boll magum-ya.
2. Amchea Bharatachea toxench Goychea sorkari voddilanim porjeche hok’k mandun gheunk ani dhorma pormonem totvam ani mul’leam jieunk adhar ani sohokar dilea puro mhonn Deva lagim magum-ya.
3. Kristi avoi-bapui aplea khasgi toxem kuttumbik jivitant, Devache ani Povitr Sobhechi vollokh gheunk, apunn poilim bhagevontponnak pauta tosle soeg nirman korunk, Bapa lagim magum-ya.
4. Mon’xacho somudai ghoddunk kuttumbacho mukhi karia zaun asa. Bhavarta vorvim ho sombondh kuttumbanim rochun haddunk, sonvskarantlean to posunk ani heach kuttumbachea vavrantlean somazak ek novsornechi dekh ani nomuno zaunk, amche Goychea kuttumbank Bapache boll magum-ya.
5. Amcho Dhormpranthik Kuttumb Seva Kendr, aplea vavra vorvim dor eke firgojent, Dezembr 2016 porian, dor eke firgojent, Natural Family planning xikoupi toyar korunk bharim vavurtat. Hea tanchea yevzonnenk, dor eke firgojent Kuttumb Seva khonn vo ‘Parish Family Service cells’ sthapun, aple firgojentle xikoupi, toyarechea xibirank dhaddunk, Bapa lagim magum-ya.

Yadnik: Bapa, jivit bodlunk soeg gheun tujea rajeant portun yeunk, amcheo gorzo ami tuje mukhar ghatleat. Teo amkam favo zalear amkam favo kor, Krista amche Somia vorvim.

Amchea Bapa: Jezun xikoilolem magnnem ami mhonntanv tedna ami ek kuttumb, ek somuday koxim lagim yetanv, ekchar onnbhovtanv. Hench onnbhovunk sogllim borobor mhonnum-ia….

Xevottak: Zoddeamno, NFP jivitan pallun, Bapachem Raj tumchea kuttumbant jie-iat. Jivit bodlunk soeg mell’la to gheun Bapachea Rajeant portun bhitor sorum-ia. Vochun yeat….