11ver Julaiache 2015: Denvte Lok-Sonk’kyecho Dis (Depopulation Awareness Day)

Dor vorsa, sonvsarant, Julaiache 11ver, vaddtolea lok-sonk’kea voir ani taka lagu zatolea sogllea addkholli / proxnnam vixim, lokam modem zagrutai haddunk Ontoraxttrik Lok-Sonk’kea dis somorombhtat,. Punn khorench mon’xancho ankddo vaddta kai? Amkam soimban favo zal’leo vostu, sovloteo, hea vaddtolea ankddeak lagun khorench kobar zait vetat kai? Hacher barik niyall korun ani hea adhunik kallachi poristhiti monant dovrun, hea vorsak ami, Goy Dhormprantik Kuttumb Seva Kendran, hea disak, “Denvte Lok-Sonk’kyecho Dis”, oso matallo  diunk ieujilam. Tor oxem kiteak kai?

Hea adhunik kallar, mon’xanchi sonk’kea hispa bhair denvot gel’li ami polletanv. Khorench mhollear zolmotolea bhurgeancho ankddo zor ami pollet zalear, to itlo denvlolo amkam disun ieta ki aichi lok-sonk’kea asa toxich pasun urteli mhonn disona. Mon’xancho ankddo vaddtolo zalear tor dor eke ostore fatlean  tin tori bhurgim zolmak haddunk zai. (Pikallponnachi Raxichalicho ankddo 2.1 asunk goroz). Ak’khea sonvsarant sod’sea asa to 2.43 (2014), Bharotant 2.4 (2012) ani 2.3 (2013), ani Gõyant  1.6 (2013). Fokot Uttar Pradesh ani Bihar-ant ho ankddo matso subez asa: 3.1 and 3.3.

Amchea Gõychea kaim ganvamnim ami pollet zalear, Pikallponnache Raxichalicho ankddo (2013/2014) hea vorsamnim denvlolo ami polletanv: Khorjuem = 1.0/0.9; Aldona = 0.85/0.65; Saligao= 1.35 (2012); Pilerne = 1.47 (2012); Socorro = 1.1 (2014) ani Penha de França = 1.2 (2014). Zorui amchea lognik zoddpeamnim, aiz thaun, panch pasun bhurgeank aplea kuttumbamnim zolmak haddlim zalear pasun ho denvtolo ankddo voir kaddunk pavchem nam,. Hache bhair, bhurgeanchem dennem nasloleam kuttumbancho ankddo vaddot veta to amakm dista. Amchea Gõyantuch odmaas kaddla to vis tok’kea voir asa mhonn gomun ailam.

Amchea Gõychea iskolamnim Gõyam bhailea bhurgeancho ankddo amchea bhurgeam von odik asa. Amchim bhurgim vhodd-vhodd xhallamnim xiktat, oxem nhoi,  bogor amchea kuttumbamnim hea iskolamnim dhaddunk bhurginch nant.

Hea vorsa, aple Gonvllik Chittint, amcho Arsebisp, hea denvtolea lok-sonk’keacher usko porgottun oso mhontta, “Kuttumbik mog ghov-bhailechea koblantintlean suru zata. He koblaticho ek bhag mhollear novea jivitachi seva: bhurgeank zolmak haddpachi. Az-kal amcheam ghorabeamnim bhurgeancho ankddo denvlolo ami polletanv… mhonntoch amcheam kuttumbamnim jivitachi sonskrutay fulounk vavrum-ia. Amchem Kuttumb Seva Kendr soimba pormonnem kuttumb-yevzonnecheam upayancho prochar kortanam osli vollokh dita; ani hache voir lokx ghalun, avoi-bapui apli zobabdari palltolim ani aplea kuttumbant anik eka bhurgeak tori zago dovortolim mhonn ast ballgita. Oxem, zolm-bondi vixim addeche upai, gorbhpatt ani her fokot lingi dhadosponn ghevpache upai nam vaprun, promannikponn ani bholaiki samballat mhonn tench kendr ulo korta” (GC 2015-16, No. 4.2).

Hakach lagun lhan nhoi punn vhodd kuttumb ghoddun haddunk amkam apoileant. Oxem kelear amkam odik hat ani chotolim monam (brains) mellteleo ani tea vorvim amchea desachi udorgot odik bore bhaxen zaunk pavteli. Amkam jivit kobar korunk nhoi bogor jivitachi sonvskrutay fulounk apoileant. Tor ugttea monan jivitachi sonvskrutay fuloupacho nirnnoi gheum-ia ani herankui xikoum-ia.

Pri. Kennet B. Teles

Sonchalok, DKSK

Thodde mudde tumche mukhar…

1. Denvte Lok-Sonk’kyecho Dis

Adhunik kallar ami zor pollet zalear, ak’khea sonvsarant monxancho ankddo zaitoch unno zait gela. Zorui tor dor’torer aslolea sogllea sat billion lokank Indonesia dhaddlole zalear, dor eka mon’xak donxim satt ani tin (273) sq.metr, ravunk suvat melltoli asli. Ani zorui tankam  Amazon-ar vhelole zalear dor ekleak ravunk sovai (3/4) kilometr zago melltolo aslo.

2. Ontoraxttrik mollar mon’xancho ankddo hispa-bhair denvot gela

Ami zor bariksannen chintun pollelear, aiz amchim panvlam eka eksurea planet-a vatten vetat mhonn ami polletanv, zhoim bhurgeanchea hanxea suater moneponn astolem; kainch avaz ascho nam. Amkam amchea kuttumbantlea toddlolea sombondha khatir khub sonsche poddtolem ani fokot itlench nhoi punn fuddarak amchea zannteancho samball korunk tornni pindka pasun amkam mellchinanam.

3. Vhodd Kuttumb – Khuxal kuttumb

Povitr Sobheche xikounnen ani sonvskrutaient nodor marlear, vhodd kuttumb zaun asa Devachea axirvadachi toxench avoi-bapaichea udarponnachi nixannim. (CCC 2373).

Dor ek bhurgem zaun asa ut’tom dennem eka kazari jivitachem / sombondachem. (CCC 2378)

4. Pikallponnache Raxichalicho ankddo

Mon’xancho ankddo zor vaddtolo tor dor eke ostoren, tin tori bhurgeank zolmak haddchi goroz. (Pikallponnache Raxichalicho ankddo 2.1 asunk goroz).