MHOJE PATTLEAN YE – GONVLLIK CHITT

Apurbayechea bhavam-bhoinimno,

2023 vorsa Bispanchi Porixodik Sobha zaupachi asa hem monant dovrun ami porixodik yatra suru kel’li asa. He porixidicho mukh’hi vixoi monant dovrun – Ekchar, Sohobhageliponn ani Misanv, amche bhov manest Gonvlli Bapan Gonvlik chitt bhair kaddlea ani Kuttumbik jivitacher khollayen usko dakhoila. Hea vorsachea Marsache 18-19ver Goy-Damanvchea Mhadhormprantachea don disamche Pur-Porixodik boskent zaiteamin dakhoilolea huske monant dovrun, Gonvllik chittint thoddeam vostumcher uzvadd ghatla. Gonvllik chittint don mukh’hi kollponacher Kuttumb dolleam mukhar dovrun nhiall kel’lo amkam dixtti poddta. Tem mhonnlear Sohobhageliponn Kuttumbant ani Missanv ani Kuttumb. Hanv Sohobhageliponn kuttumbant hacher lokx ghaltolom.

SOHOBHAGELIPONN KUTTUMBANT:

Kristi kuttumb mhonnlear ‘Ghorchi Povitr Sobha (LG 11) ani odik mon’xall zaunchi xalla (FC 21) mhunn vollkhun gheun kuttumbachem sohobhageliponn, jivitachi rakhonn korun, kuttumbik akarni gheun ani vangddianchem vhorteponn ballgun disun yeunk zai mhunn Gonvllik chittint bhor ghal’lo asa.

Sohobhageliponn: Jivitachi Rakhon Korun: Devan, dadleak ani bailek apnna sangati rochneche sevek sohobhageli korun ek novi monis-jinn zolma haddunk kurpa ani dennem dilem. Utpotichea Pustokant, Devan apna sarkeachim ani aple rupachim dadlo ani bail rochlim ani “Choddat ani vaddat, prithum bhorat’ mhunn adesh dilo.  Logn Sonvskar eka-mekak ditanam ani ghetanam, apnachem ap-dan eka-mekak korun jivit rochun haddchea vaurant Rochnar Devachim sohobhegeli zaunk tim apli khuxi dakhoitat ani utor ditat. Punn, hea adhunik kallar ghov-baile mukhar torekvar avhanam ubim zatat ani haka lagun jivitacho nas korunk paul marchi tallni uprasta; ghorbat korun ani Povitr Sobheche xikovnnen addvarlole upai vapdun, rochnechea vaurant apleak dil’lem sohobhageliponn monis visorla ani Povitr Sobha choddounk ani vaddounk ek vhodd addkholl to zala. Osle poristithint lognik mog jivitache sevek ani tacho haves mhollear Devache yevzonnek aitim ravun, novo jiv rochun haddunk Lognacho Sonvskar zoddloleamin ghott monant dovrunk gorjechem. Ani jivita add ji mornachi ani apsuvarthi kuddichi dadoskay bhogpachi sonskrutai vaddot asa ti nattak korunk vaurunk soglleamni upai gheunk zai. 

Sohobhageliponn: Kuttumbik Akarnni Gheun: Hem sohobhageliponn jivem ani chalu urunk kuttumbik akarnni gheunk mhotvachem. He dixen Dhormprantik Kuttumb Seva Kedran mhotvachim paulam marleant ani sobar kariavolli manddun haddloleo asat. Teo mhonllear Logna adim akarnnechim xibiram, zobabdarik avoi-bapaiponn, kuttumbank lagu zatolea vixoyam vixim, zagrutay haddunk, firgojent porbek bori toyari korche passot ‘Amoris Laetitia’ hacher aslole xikovnecher adarloli kuttumbik missanv, firgoz molar Kutumb Seve Pongodd ani kuttumbik jivitacher xikovnn. Hea kariavollincho labh amchea kuttumbank mellcheak ani khorim Kristi kuttumbam koxim akarun yeuncheak, tantunt sohobhageli zaunk gorjechem.

Sohobhageliponn: Vangddianchem Vorteponn Ballgun: Sohobhageliponnachi buniad ghott zata jedna vangddianchem vorteponn ballgun dovortanv tedna. Kuttumbacho dor ek vangddi mogacho ani mhotvacho hem kednanch visrunk zaina. Punn, aiz amchea kuttumbanim vhodd huske vaddleat. Hispa bhair duddu moddop ani asonui noveo vostu ghevop, bhattank lagun kestanvam, axea ani gorv, familint fodd-modd korop, gorjeche bhair spordhechem mon ani okmanachi vagnuk. Hea soglleak lagun kuttumb jin’savar tufanank sampoddta (SDS 59). Sonvsari mon vaddot gelam dekhun kuttumbik mon’xachea jivitant marekar poristhiti mirmann zal’li amkam dixtti poddta. Amchea kuttumbant opangull vangddi asom yeta vo utar pirayek paulolim ani vidva zal’lim astat. Oslea vangddeank ami koxim lekhtanv zait? Porixodik vatt choltanam soglleamcheo gorzo ukhlun dovorunk ani dor ekleachem vhorteponn ballgunk kitlem gorjechem tem uzvaddak ail’lem asa. Pordexi bhavam-bhoinim sovem boreponn dakhoun, opangul vangddeam sovem monxallayen vagun, utar pirayek pauloleank sobhavikponnim jieunk ani vidvank odik promannan mon’xalo man ani sangat diun sohobhageli zaum-ia.

Dor ek kuttumb Devachem dennem ani dor ek kuttumbacho vangddi mogacho ani mhotvacho. Aplem kuttumb jivall (bolaiken bhorlolem), khuxal ani povitr korunk, apnank ek kherit misanv ani vhodd zababdari asa mhunn vollkhun, dor eka kuttumbachea vangddean bharim vaurunk amchi vinonti. Devachem Utor kuttumbant vachun ani niyallun, teach Utranlean Kristi kuttumb ek mogachi ghorchi Povitr Sobha zaunk amcho usko ani anvddo.Dev borem korum ani Devan dor eka amchea kuttumbacher ani kuttumbachea vandeacher axirvadd ghalun.