Gonvllik Chitt 2015-2016 “KUTTUMBA, KUTTUMB ZA”

             ARCHDIOCESE                                                                                                         Archbishop’s House,

                   OF                                                                                                              P.O. Box No. 216

          GOA AND DAMAN                                                                                          Panjim – 403 001

PATRIARCHATE OF THE EAST INDIES                                                                         GOA – INDIA

Tel: (0832) 2223353, 2225291

                                                                                                                     Fax No: 91-832-2224139

E-mail: archbpgoa@gmail.com

CP-Past/107/2015

Gõy ani Damanv Mha-dhormprantacheam

Yadnikank, Dharmikank, Loukik Bhavarthiank

ani Borea Monacheam Mon’xank

Gonvllik Chitt

“KUTTUMBA, KUTTUMB ZA”

Priticheam Bhoinnim-Bhavamno,

“Deva amchea Bapachi ani Somia Jezu Kristachi doyallai ani xanti tumkam” (Ef 1: 2).

  1. Halincheam vorsamnim, amchem Kristi jivit mozbut korunk ami vavurleanv. Povitr Sobha Kristi jivitachem mondir; ani kuttumb mhollear ek ghoravi Povitr Sobha, ek machi; ticher Povitr Sobhechea karyacho vevhar zata; hea pasot Fransisk amchea Pap Saiban, heam don vorsamnim, eka pattlean ek, kuttumba voir bhasabhas korunk Bispancheo don Porixodô ektthaim apoyleant. Porum zal’le Porixodent Bispamnim Pap Saibak kaim suchnna kel’leo. Heo suchnna monant dhorun ani mhojim-i kaim kolponam ekttavun, hanv hi Chitt boroitam.
  1. Aplea Somiacheam panvlamnim cholun, Povitr Sobhen kuttumbachem mhotv sodanch vollkhun ghetlem, rakhlem ani porgott kelem. Somi Jezu kuttumbant zolmolo, vaddlo (polle Mt 1; Lk 1 – 2) ani aplea karyant kuttumbachem mhotv samball’lem (polle Mt 19: 3-12; Ju 19: 25-27). Povitr Sobha survatek thavn kuttumbik sonskrutaye pormannem jiyet ailea (polle DI 2: 44-45, 4: 32, 18: 8; Rom 16: 5; 1 Kor 16: 19; Filem 1: 2). He chalivelean, Vatikani II Vixv Sobhen ani Bhag. Juanv Paulu Dusrean tika “ghoravi Povitr Sobha” mhonn pacharli  (polle LG 11; FC 17, 49; CCC 1655-1656). Az meren, hi porgottnni unni zali nam. Veg-veglleam Pap Saibamnim ani heram thollaveam (regional/local) Gonvlliamnim kuttumbachem promannikponn samball’lem ani porgottlem.
  2. Hi girest porompora samballun, kuttumb ghoddlam Tacher (Deva Bapacher) ani kuttumbachi girestkay dakhoilea Tacher (Jezucher) nodor ghalun ani tem choloita Tachea (Povitr Atmeachea) uzvaddan kuttumbachim kaim muliam spoxtt korunk hi Chitt boroitam. Hi Povitr Tritvi dor eka kuttumbacho oromb ani xevott. Hich Tritvi dadleak ani bailek kuttumbik apovnneak veng marunk avhan dita (polle FC 11). Kedem vhodd apovnnem logn-jivitachem! Tacho tthav amchean gheum nozo!
  3. Hea sondorbant Bhag. Juanv Paulu Dusrean kuttumbachim him chear karyam amcheam dolleam mukhar dovorleant: i. Mon’xancho somuday bandop; ii. Jivitachi seva korop; iii. Somazache udorgotint misoll zavop ani iv. Povitr Sobhechea jivitant ani karyant vantto ghevop (polle FC 17).

4.1.         Mon’xancho Somuday Bandop

Kuttumb lognik koblatintlean suru zata. Hache velean don kuttumbam mogantlean      vinnun yetat. Mon’xancho somuday koso jiyeunk, vaddunk ani   purayek pavunk, kuttumbak mogachi goroz. Ho mog Devachea moga sarkelo zaunk favo (polle 1 Ju 4).

Hea mogavelean amchi vagnnuk kosli zaunchi ti Bhoktivont Paulu Sovea Pap Saiban, Humanae Vitae hea Prosidh-Potrant viskuttaun sanglam tacho ulekh hanv hanga kortam (polle HV 9):

 a. Ho mog purayen mon’xa soimbacho zaunk zai, polleun-aikun-bhogun   otmik bollan  vinnlolo, bhavnnancheruch dhorlolo nhoi, punn meklleponnan      ghetlolo nirnnoy. Tacho xevott dispott’tea jivitachea sukh-dukhakuch fuddo korunk nhoi, punn ghov-bail eka kallza-monachim zaun, monisponnache sopurnnayek pavunk.

b. To purnntayen kel’lo mog zaunk zai, khol ixttagoticho, zache velean ghov ani bail, ap-aplo faido pollenastanam, sogllem bhagak ghetat. He toren aplea sangatiacho khoro mog korta to aplem boreponn sodinam, punn aplea sangatiachem.

c. Ho mog moro porian visvaxiponnacho zaunk zai. Osloch mog logna disa hokol-novro ekamekak bhasaitat. He toren mog korunk ani jiyeunk khub avghodd; punn korunk zaina oxem nhoi. Zaitim ghov-bailam tokhnnay korpa sarkelea oslea mogan jiyetat ani lognik visvaxiponn khol ani togta toslea sontosachi zhor mhonn sakxi ditat.

d. Ho mog follvont: Oslo mog ghov-baile modem somponam; to soimbinch novem jivit utpon korpa sarko. Hakach lagun lognik mog sonvsarak ani Povitr Sobhek novim bhurgim divpant sufoll. Khorem mhollear, bhurgim eka lognik jivitachi tenkxi.

Logna disa, Deva nanvan, yadnik hoklek ani novreak tin vichar korta. Te osleach moga vixim. Aplea zobabantlean Deva sarkelo mog korunk tim utor ditat. Hoch to Devachea mogacho korar!

4.2.         Jivitachi Seva Korop

Voir mhollam toxem, kuttumbik mog ghov-bailechea koblatintlean suru zata. He koblaticho ek bhag mhollear novea jivitachi seva: bhurgeank zolmak haddpachi ani tankam Kristi muliamnim lhan-vhodd korpachi zobabdari.

Bhurgim Devachem dennem (polle Ut 1: 28). Tankam zolmak haddun, ghov-bail Devachea rochpachea vavrant sohobhageli zatat. Teach borobor, Jezun suru kel’lea soddvonnechea vavrant tim sohokar ditat mhonn ami visrum noye: “Bhurgeank Mhoje sorxim yeunk diat ani tankam addainakat, kiteak Sorginchem Raj osleanchench” (Mt 19: 14). Ho somoz Kristanvanchoch nhoi. Rabindranath Tagore-anui oslem ek nivedan (statement) kel’lem: “Dev ozun mon’xancho mog korta mhonn dor ek bhurgem sondex gheun yeta.”

Bhurgeanchi akarnni he zobabdarecho ek mhotvacho bhag. Bhag. Juanv Paulu Dusro xikoyta tea pormannem, avoi ani bapui apleam bhurgeank mogan ani moga pasot zolmak haddtat ani aplea kuttumbant monis-gunn kolaytat (polle FC 36-37). Oxem tim Devachi manddavoll palltat.

Gel’lea vorsache Gonvllik Chittint ami oxem boroil’lem: “Az-kal amcheam ghorabeamnim bhurgeancho ankddo denvlolo ami polletanv …… mhonntoch amcheam kuttumbamnim jivitachi sonskrutay fulounk vavrum-ya” (GC 2014-15, 3). Hea pasot dadlea-bailechea jivxastrachi (biology) vollokh mhotvachi (polle Caritas in Veritate 48). Amchem Kuttumb Seva Kendr soimba pormannem kuttumb-yevzonnecheam upayancho prochar kortanam osli vollokh dita; ani hache voir lokx ghalun, avoi-bapui apli zobabdari palltolim ani aplea kuttumbant anik eka bhurgeak tori zago dovortolim mhonn ast ballgita. Oxem, zolm-bondi vixim addeche upai (contraceptives), gorbhpat ani her fokt lingi dhadosponn ghevpache upai nam vaprun, promannikponn ani bolaiki samballat mhonn tench Kendr ulo korta.

Hea vellar bhurgeachem dennem nasloleam kuttumbancher amchem dhean-mon veta. Tim unnemponn bhogtat ani niraxi zatat tem polleun amchem kalliz oddta. Oslea vellar Devacher visvas dhorun, Povitr Sobhen mandun ghetloleam upayam vorvim jiyeunk hanv tankam ulo martam. Zata tednam bhurgeak posunk poryan fattim sorchem nhoi.

4.3.         Somazache Udorgotint Misoll Zavop

Kuttumbachem ani somazachem karya ekamekak purnn kortat (polle Ut 1: 28). Kuttumbachea karyacho porinnam’ somazacher zata zalear somazacho porinnam’ kuttumbacher zata. Xikxonnik, kuttumbik ani her osleam somajik karyamnim kuttumbank zobabdari asa. Kristi muliamnim nettoylolea jivitan, ap-aplea vavrachea zagear ani somazacheam bandavollimnim misoll zaun tim khomir zaunk pavchim. Kuttumbacheam vangddiamnim oslim muliam apnnaun, somazant Jezuchim sondexkaram zanvchim.

Sorkari odhikariamnim, kuttumbachem boreponn polleun, apleo yevzonneo manddun haddop: ho kuttumbacho ek hok’k (polle FC 46).

4.4          Povitr Sobhechea Jivitant ani Karyant Vantto Ghevop

Povitr Sobha Kristi kuttumbanchem Kuttumb. Ti kuttumbant jiyeta zalear, Kristi kuttumb Povitr Sobhent aplem jivit ani aplo akar gheta (polle FC 49). Hem kuttumbachem ani Povitr Sobhechem boll.

Devachea Utrachê moddnentlean ani niyallantlean, Povitr Sobhechi Dotorn (Catechesis) ani Xikovnn (Teachings of the Magisterium) svikarunk ekdom mhotvachem. Aplea sonvskarik jivitantlean ani veg-veglleam poristhitink lagu zata team axirvadacheam magnneam udexim, kuttumbamnim aplo bhavarth odik kholauncho ani dispott’tea jivitant vevharant ghalcho.

Ek-eka panvddear kuttumbik jivitachi kallji gheunk Povitr Sobhechi zobabdari ani ticho odhikar. Amcheam firgozamnim, poixil’lê-lagxil’le lognache toyarent toxench somarombhnnent, lognachim ani kuttumbachim muliam vistarchim.

Amcheam kuttumbamnim bhavarth dakhoitoleo ani kholaitoleo kitleo-xeoch sobit chali asat! Dekhik, sokallchem-ratchem prarthon, aymori-ters ani jevnnar magnnim korop, vhoddilancho axirvad ghevop, Saibinnichem bentin ghalop, povitr udkacho devosponnim vapor korop, adi. Hanchea adaran apnnaylolo bhavarth kuttumbant jiyeun, ‘tim sogllim ek zaum’ (polle Ju 17: 21), ho Jezucho anvddo sakar zata. Hea sondorbant dor eke firgojent Kuttumb Seva Khonn (Parish Family Service Cells) suru korunk nettan panvlam marchim ani forgozkaram ‘Kuttumb Seveche Adhari’ xibiramnim (Training of Trainers) vantto gheunk fuddem sorchim.

Sompadnni

Hi Chitt sompoitanam, amcheam yadnikamnim, mottvaxi bhoinnim-bhavamnim, kuttumbik sonsthamnim ani lhan Kristi somudayamnim kuttumba sovem kherit gonvllik husko dakhouncho mhonn mhoji itcha porgott’tam. Tumam somestank mhojea magnneant dhorun, Devacho bhorpur axirvad tumcher magtam.

Magnnem

Sorginche Maie, Devachi Chakornn ani Kuttumbachi Avoi tum!

Bapache yevzonnek udarponnan Tum ayti zalii.

Sant Juze tujea Poti sangatim tunvem Nazaretchea Ghorabeacho samball kelo

Amcheam kuttumbamnim Tujeam panvlamnim panvl ghalun,

Apli zobabdari pallunk  tanche khatir vinonti kor.

Sant Juze Vaza, amchea Askaria,

Kristi kuttumbacheam muliamnim vaddun tum yadnik zaloy

Ani  Jezuk, tujea ani amchea Somiak, veta thoim tunvem porgott kelo.

Amche kuttumb heanch muliam pormannem cholunk

tunch za tancho adar ani uzvadd. Amen.

 

Arsebispachem Ghor, Ponnje, Gõy, Povitr Atmeachea Yenneachi Dobajik Porob,

Mayachi 24vi, 2015.

 

(+ Filipe Neri Ferrão)

Gõy-Damanvcho Arsebisp

 

VAPURLOLE DAKHLE

LG       Lumen Gentium

FC       Familiaris Consortio

CCC     Catechism of the Catholic Church

HV      Humanae Vitae

GC       Gonvllik Chitt

CV       Caritas in Veritate